Du er her:

Lagesduottar – gosa Grenselandet AS áigu bidjat bieggafápmorusttega. (Govva: Michał Siarek)

Lagesduottar – gosa Grenselandet AS áigu bidjat bieggafápmorusttega. (Govva: Michał Siarek).

Hilgo Grenselandet oastima!

Cealkámuš Ávjovári luonddugáhttenlihtus 30.09.2020

Grenselandet AS, mii áigu Lágesduoddarii hukset Norgga stuorimus bieggafápmorusttega, lea dál geahččaleame buot vejolaš vugiid fillet ja oastit olbmuid sin beallái. Sii leat lohpidan boazoeaiggádiid máŋga miljovnna buhtadussan ja Sápmi Ealáhusgárdái logi miljovnna skeaŋkan jus besset hukset.
23.09.2020 muitala Ávvir ahte Finnmark Rein uhkida geassádit Sámi Ealáhusgárddi oasseeaiggádin jus ii boađe čielga cealkámuš ahte ealáhusgárdi hilgu dan fálaldaga. Direktevra cealká "Mii eat vuovdde iežamet boahtteáiggi eret". Kárášjoga gieldda lea maid čielgasit vuosttildan huksenplána ja várresátnejođiheaddji cealká ahte "dien seavtti eat dohppe".

Ávjovári luonddugáhttenlihttu doarju ollásit Finnmark Rein ja Kárášjoga gieldda dán áššis. Muhto mii leat hui beahttahallan go oaidnit maid eará Ealáhusgárddi eaiggádit vástidit. Sámi Ealáhusgárddi stivrajođiheaddji Arvid Mathisen ii áigo hilgut fálaldaga ja eará suohkanat eai oro ge dahkame maidege.
Grenselandet plána šáddá stuorimus sisabahkken lundui ja boazodollui Finnmárkku historjjás, ollu stuorit go beaggán Álttá-dulvadeapmi. Mii vuordit ahte sámi gielddat dál doaimmalaččat bealustit min luonddu ja eallinvuođu ja bivdit ahte gieldastivrrat dahket čielga mearrádusaid huksema ja oastingeahččaleami vuostá.

 
Ávjovári luonddugáhttenlihttu / Naturvernforbundet i Ávjovárri

Svein Lund
jođiheaddji

Piera Jovnna Somby
nubbi jođiheaddji

Artikkelen ble sist oppdatert: 02.10.2020

Ođđasat

Hamnefjell24
Cealkámuš Finnmárkku luonddugáhttenlihtu jahkečoahkkimis 13.09.2020

Bisset Davvi ja eará bieggafápmohuksema Finnmárkkus!

Finnmárkku luonddugáhttenlihttu illuda go lea vuođđuduvvon álbmotakšuvdna Davvi bieggafápmoplána vuostá. Dát plána šaddá bilidit agibeaivái hui erenoamáš luondduguovllu mii dán rádjái lea leamaš sisabahkkema haga.

Viser fra 1 til 4 av totalt 7 artikler