Du er her:


Foto: Svein Lund

Ruvke ja boazodoallu oktii?

Rabas reive ealáhusministarii Trond Giske

Prográmmas Gollegiisá, mii sáddejuvvui NRK2:s aittoláhkái, celkkii ealáhusministtar Trond Giske ahte lea ollislaččat vejolaš minerálaid roggat ođđaáigásaš vuogi mielde seammás go boazodoallu sáhtte joatkit muosetkeahttá. Diet lea illudahtti jos leažža duohta. Lea áibbas ođđa dilli dan ektui go ovdal leat vásihan ruvkedoaimmaiguin boazodoalloguovlluin.

Seamma prográmmas maid bođii ovdan ahte ovddeš ruvkedoaibma Biedjovákkis ráfehuhtte boazodoalu garrasit, vel ruvkefitnodat mieđihii ahte sii mákse buhtadusaid vahágiid ovddas maid boazodoallu gillái. Prográmmas čuoččuhii Árctic Gold direktevra ahte galgá vejolaš ahte ruvkedoaibma ja boazodoallu birgeba seamma eatnamiid nalde. Son lea gal ovdal viggan fállat oastit ođđa guođohagaid sidjiide geat masset guođohagaid. De han juo lea dovddastan ahte boazodoallu ii sáhte ráfis joatkit nie go ealáhusministtar čuoččuha. Biedjovákki ruvkkiid plánaprográmma ii man ge láhkái čájet ahte lea sáhka ođđa teknologiijas mii dagahivččii ahte ruvkedoaibma válddášii buorebut vuhtii birrasa dahje boazodoalu go ovdal.

Dien vuođul jearrat ealáhusministaris:

– Makkár boazodoallofágalaš ekspertisa nalá hukse Ealáhusdepartemeanta iežas čuoččuhusa?

– Sáhtát go čájehit ovdamearkkaid gos ruvkket boazodoalloguovlluin eai leat dagahan boazodoalu ovdii?

– Mii lea ođas ođđaáigásaš ruvkedoaimmain mii dagaha ahte ii muosehuhte boazodoalu?

– Stáhta lea golahan 100 milliovnna kr ohcat málmma. Man olu lea golahuvvon ovdánahttit ruvketeknologiija mii váldá vuhtii birrasa?

– Jos čájehuvvo ahte ruvkkedoaimma ii sáhte čađahit nu ahte boazodoallu ii gillá, áiggut go de bissehit ruvkkedoaimma vai galgá go boazodoallu vuoittahallat?

– Geas lea odne nanumus juridihkalaš vuoigatvuohta dieidda guoskevaš guovlluide, lea go boazodoalus gii lea geavahan guovlluid čuđiid jagiid, vai ruvkefitnodagain geat ožžo ohcanlobiid moadde jagi áigi?

Finnmárkku luonddugáhttensearvi

Gunnar Reinholdtsen

jođiheaddji

 

Artikkelen ble sist oppdatert: 18.02.2015

Ođđasat

Viser fra 1 til 4 av totalt 21 artikler