Ikkje lov å nydyrke skog på Bore
Ein bonde på Bore i Klepp får ikkje lov til å nydyrke fem dekar skog attmed Jærstrendene landskapsvernområde. Naturvernforbundet og Ornitologisk Forening har fått medhald i sin klage på vedtaket gjort av politikarane i Klepp.
Den aktuelle skogteigen grensar til landskapsvernområdet. Sommaren 2016 blei cirka eit dekar av skogen rydda av bonden. Arealet er registrert som viktig naturtype og ryddinga var ikkje omsøkt. Bonden søkte så om å rydde og deretter nydyrke skogteigen. Administrasjonen i kommune innstilte på avslag, men politikarne meinte det ikkje var viktige naturverdiar i området og ga løyve. Dette løyvet påklaga Naturvernforbundet og Ornitologisk Forening. Klagen ble avvist av Klepp-politikarne, men no har fylkesmannen gjeve klagarane medhald.
Bonden får ikkje jordarbeide, gjødsle, så, sprøyte eller kalke det aktuelle området. Han kan leplante med godkjende treslag. Fylkesmannen sitt vedtak er endeleg og kan ikkje påklagast.