Naturvernforbundet i Sogn og Fjordane har jobba i lag med lokallaget i Bremanger og andre frivillige for å få anmeldt Bremanger kommune ved ordføraren for brot på fleire sentrale miljølover i samband med miljøøydeleggingar på Holmaneset den 30.mai 2025.

Anmeldelsen gjaldt moglege overtredelsar av straffelova § 27, plan- og bygningslova, motorferdsellova og naturmangfaldlova.
Bakgrunnen for anmeldelsen var alvorlege lovbrot i samband med inngrep i natur utan tilstrekkelege vurderingar og løyve. Dette gjeld mellom anna køyring i utmark og øydelegging av unik kystfuruskog, utan at det er søkt om løyve etter motorferdsellova eller gjort vurderingar etter naturmangfaldlova.

Den 18.juni etterspurte Statsforvaltar i Vestland ei tilbakemelding om korleis tiltaka på Holmaneset har vore handsama av kommunen. Kommunen svarte at dei i ettertid ser at dei burde følgt opp saka nærare og etterspurt meir detaljar om arbeidet. Naturvernforbundet meiner dette viser at kommunen ikkje har oppfylt sitt ansvar som forvaltningsorgan, og at det må stillast strengare krav til kommunane si sakshandsaming og kunnskapsgrunnlag i slike saker.

Dette handlar ikkje berre om ei enkel byggesak. Her står vi overfor grove forsømmingar av naturrettslege plikter og mangelfull demokratisk sakshandsaming. Naturverdiane på Holmaneset er nasjonalt viktige, og det er avgjerande at lovverket blir følgt, også av kommunane.

Naturvernforbundet fryktar at denne saka kan skape presedens i liknande saker i framtida. Difor forventar vi at politiet tek denne saka på alvor, spesielt sett i lys av det mangelfulle svaret frå Bremanger kommune. Denne saka handlar ikkje berre om miljølovbrot,  men òg om tilliten til forvaltninga og rettsstaten.

Vidare er det sendt inn tips til økokrim om å kunne potensielt anmelde tiltakshavar som har utført lovbrotet, Holmaneset H2 AS (Fortescue).

Bremanger kommune sitt svar til Statsforvaltar om lovbrotet:
https://bremanger.kommune.no/tenester/politikk-og-innsyn/postliste-og-innsyn/postlista/#/details/a-0baea8f5__defa__4603__b396__17b5d409cf0e-2022009430!2xgsSz/d-0baea8f5__defa__4603__b396__17b5d409cf0e-2022049899!KaC74c