FeFo duppalrolla

Guhkes čállosis Ávviris 15.11. bealusta direktevra Jan Olli FeFo ONa álgoálbmotraportevrra kritihka vuostá. Mii eat áiggo searvat digástallamii Finnmárkku meahci oamástanvuoigatvuođa birra, muhto háliidit kommenteret mot FeFo seaguha hálddašeami ja gávppašeami. Mii dáhpáhuvvá mehciin go FeFo sáhttá dinet ruđa luonddubillisteamis?

Finnmárkkulága ulbmilparagráfas lea čállon: «lága ulbmil lea lágidit diliid nu, ahte eatnamat ja luondduvalljodagat Finnmárkku fylkkas hálddašuvvojit dássedis ja ekologalaččat suvdinnávccalaš vuogi mielde fylkka ássiide buorrin ja erenoamážit sámi kultuvrii, boazodollui, meahcásteapmái, ealáhusdoaimmaheapmái ja servodateallimii vuođusin.»

Olli čállá «FeFo lea odne mieleaiggát dušše ovtta gávppálaš fitnodagas; Finnmark Kraft AS. Duogáš ahte FeFo searvvai eaiggátbeallái dan fitnodahkii lei sihkkarastit ahte báikkálaš doaibmit ávkkástallet báikkálaš bieggafápmoresurssaid, ja dainna lágiin heivehit ovdáneami mii buvttiha geasuheaddji ja ceavzilis bargosajiid.» Maid son ii loga lea ahte Finnmark Kraft plánat leat Finnmárkolága ullbmila vuostá.

Ovttas Fred Olsen Renewables:in lea Finnmark Kraft álggahan Aurora Kraft, mii lea ohcan konsešuvnna hukset guokte bieggafápmorustega Fálesnuoris. Nuppi lea NVE hilgon go vahágat boazodollui ja lundui livčče beare stuoris, nuppi fas lea NVE dohkkehan, muhto máŋgga váidaleami maŋŋá lea Oljo– ja Energiijadepartemeanta hilgon dan sullii seamma ákkáiin. Áibbas ulbmilparagráfa vuostá lea FeFo dan láhkái dorjon dakkár hui duođalaš luonddubillistemiid, ahte velá guovddáš Norggga eiseválddit leat hilgon muhtin dain. Finnmark Kraft lea maiddái ieš plánen golbma bieggamillorustega, dát plánat eai leat vel gárvis gieđahallojuvvon. Dasa lassin lea Finnmark Kraft máiddái plánen vihtta čáhcefápmorustega, dain lea okta dohkkehuvvon, guokte hilgojuvvon ja okta váidaluvvon departementii.

Vearrámus luondubillistemiid gaskkas mii lea plánejuvvon Finnmárkkus lea Nussira ruvke Fálesnuoris. Dán áššis doarjjui FeFo stivra luoitinlobiohcama.

Oktiibuot dát čájeha ahte eanaš huksenplánain mat leat leamašan dan maŋŋá go FeFo vuođđoduvvui, de lea FeFo leamaš huksejeaddji bealis, ii ge luonddu bealis.

Dál leat boahtime ođđa plánat main FeFo sáhttá dinet ruđa luonddubillisteamis, ee Elkem Tana ruvkke viidideamis Juovlavuonas.

Eará dienasgáldu mii sáhttá šaddat ulbmilparagráfa vuostá lea bivdokoarttaid vuovdin. Dákkár koarttat leat divrraset olbbobealde olbmuide go Finnmárkku olbmuide. Earáin sániiguin, dađe eanet olbmot geat bohtet lulde ja olggoriikkas bivdit dáppe, dađe eanet dine FeFo. Dan oinniimet dán čavčča rievssatbivddus. Eai baljo lean rievssahat, ja FeFos livččii vejolašvuohta Finnmárkolága mielde biehtalit vuovdit bivdinkoarttaid olggobealde olbmuide. Muhto válljejedje báicce vuovdit eambbo.
Lea govttolaš ahte olgobealde olbmot geat bohtet deike ávkástallat min meahci galget máksit, ja ahte máksu galgá leat báikkálaš servodagaide ja fylkii buorrin, muhto mii ballat ahte FeFo duppalrolla sáhttá dahkat ahte FeFo vállje dietnasa ovdal birasgáhttema. Dát duppalrolla sáhttá leat ollu stuorit čuolbma go dan maid FeFo-direktevra čállá.

Ávjovári luonddugáhttenlihttu

Roy-Arne Varsi
jođiheaddji