Guovdageaidnu: Rabas čoahkkin Biedjovákki birra
Mánnodaga 02.12.2013 lágiidii Ávjovári luonddugáhttenlihttu rabas čoahkkima Biedjovákki ruvkeplánaid birra. Mii bovdiimet erenoamážit suohkanstivrra, mii guovtti vahku geahčen galgá mearridit ášši.
Dás sáhtát lohkat presentašuvdna maid Ávjovári luonddugáhttenlihtu jođiheaddjis lei čoahkkimis.
Su maŋŋá logaldalai Mikkel Nils Sara boazodoalu ja ruvkedoalui birra.
Dihtet go dán Biedjovákki birra?
Fargga galgá Guovdageainnu suohkanstivra mearridit maid sii oavvildit Biedjovákki ruvkeplánaid birra. Muhto mii geat orrut suohkanis ja sii geat galget mearridit, diehtit go mii maid ruvkedoaibma dagaha?
Luonddugáhttenlittu áigu dahkat de go Arctic Gold, ja bovde suohkanstivrra lahtuid čohkkimii. Čoahkkin lea
Loaŋkkogielas mánnodaga 02.12.2013 kl. 18-20.
Mis eai leat millijuvnnat addit kultuvrii ja ealáhusfondii, muhto mii leat veháš roggan ášši ja gávdnan muhtin vástádusaid ja vástitkeahtes gažaldagaid maid mii áinnas juogadit singuin geat galget mearridit.
Dá leat muhtin ráje min vástadusain ja gažaldagain:
– Arctic Gold čuoččuha ahte lea sáhka dušše 5km2. Muhto boazodollui lea sáhka mihá stuorát guovlu. Galle siidda fertejit heaitit?
– Nussir lohká ahte eanandeponi dagaha ahte lossametallat mannet lundui. Movt de eanandeponiain Biedjovákkis?
– 1988 geavahedje Biedjovákki ruvkkes oktiibuot 143 tonna kemikaliaid Flotanol, boldon gálkka, natriumamylxantat, Aerophine ja kalsinerejun soda. Gos leat diet kemikaliat dál? Makkár kemikaliaid áigot dál átnit ja man ollu?
– Maŋemus áigodagas lea báhcán čielggadanláttu ruvkeguovllus man gohčodit «Fangeljávri» mii lea ožžon vuosttaš eaiggada nama. Dál lea mannan 22 jagi dan rájis ja dien láddos leat hirbmat ollu lossametallat.
– Máilmmis lea 100000 tonn golli lágeris. Manne boltut visot Biedjovákki ohcat vel 4 tonna?
– Minerálástrategia lohká ahte Norga galgá leat bivnnut internašonála mineralindustriai. Mii dagaha ahte háliidit bidjat ruđaid Biedjovággái? Doppe ii leat nu hirbmat válljit, ii leat álki duohkin viežžat. Mii de sáhttá leat? Heajos bálkkat? Unnán birasgáibádusat?
– Unnit go ovtta proseantta luonddus leat geahččalan fievrredit ruovttoluotta (revegeteret). Makkár lea odne doppe? Makkár šaddá jos besset vel oktii doppe roggat?
– 5 km Biedjovákki birra leat lassin Arctic Gold 4 eará fidnodaga ožžon ohcanlobiid: Norwegian Mineral Group, Norwegian Resource Venture, Scandinavian Resources ja Mineralia. Geat dieid eaiggádit?
– Arctic Gold áigu addit ruđaid Sámi joatkkaskuvlii ja boazodoalloskuvlii vai álggahit ruvkelinjjá. Go Biedjovákkis loahpahit 5-6 jagi geahčen, maid de galget oahppan ruvkebargit dahkat?
– Konsuleantafitnodat Rambøll lea dahkan plánaprográmma. Olmmoš gii dalle barggai doppe lea dál Arctic Golda stivrras. Galgá go seamma fitnodat dahkat konsekveansačilgehusa? Šaddá go objektiiva ja luohttehahtti diehtu?
Eanet dieid áššiid birra gulat jos boađát čoahkkimii. Čoakkin lea rabas buohkaide.
Bures boahtin!
Ávjovári luonddugáhttenlihttu