Galgat go mii álggahit luondduguovddáža Guovdageidnui?

Ávjovári luonddugáhttenlihttu ávžžuha álggahit luondduguovddáža Guovdageidnui. Ulbmil lea duođaštit ja čájehit min suohkana luondduriggodagaid ja daid geavaheami. Guovddáš lea jurddašuvvon sihke báikkálaš olbmuid, turisttaid, skuvllaid ja dutkiid várás.

Mii sávvat ahte don ja du searvi/ásahus sáhttá searvat ságastallamii ja ovdánahttimii jurdaga ja bovdet din

Rabas čoahkkimii Kafe Riskkus duorastaga 26.11.2015 dii. 1900.

Čoahkkimis mii áigut ovdanbuktit eanet jurdagiid dan birra maid dákkár guovddáš sáhtášii dahkat, geaiguin ovttasbargat ja mo ruhtadit. De mii addit sáhkavuoru buohkaide geat bohtet cealkit sin oainnu áššis. Mii sávvat ahte čoahkkimis sáhttit álggahit joavkku mii bargá viidáseappot dáinna.

Dá leat moadde vuosttaš jurdaga maid dákkár luondduguovddáš sáhttá dahkat:

– Čájáhusaid, govaid, filmmaid jna. bokte čájehit iešguđet meahcástanárbevieruid Guovdageainnus (bivdu, šattut jna.) ja mo sáhttá geavahit daid riggodagaid.

– Addit suohkana mánáide ja nuoraide eambbo máhtu ja beroštumi luonddus, nu ahte sii movttáskit geavahit ja gáhttet dan.

– Addit turisttaide dieđu min luondduriggodagaid birra, maid sii sáhttet dáppe vásihit ja mo sii berrejit láhttet meahcis vai eai bilit ja hehtte báikkálaš olbmuid meahcásteami.

– Doaibmat álbmotmeahcceguovddážin (nasjonalparksenter) dálá ja vejolaš boahttevaš suodjaluvvon guovlluid birra.

– Čájehit nu ollu go vejolaš šaddo- ja eallešlájain mat gávdnojit suohkanis. Searvat Artsdatabankena registreremii.

– Geađgečoakkáldagain ja eará geologalaš diehtojuohkimiin čájehit suohkana ja fylkka geologalaš máŋggaidvuođa, ja mo dat lea geavahuvvon.