Rávdna Anti: Logaldallan
Finnmárkku Luonddogáhttenlihtu seminára «Luonddugeavaheapmi ja luonddugáhtten Finnmárkkus, Guovdageainnus 22.01.2010.
Dat ii leat dušše luonddugáhttensearvi áigumuš suodjalit luonddu. Dat lea maid daddjon hui čielgasit finnmárkkulágas, ja mun siteren dan:
«Lága ulbmil lea lágidit diliid nu, ahte eatnamat ja luondduvalljodagat Finnmárkku fylkkas hálddahuvvojit dássedis ja ekologalaččat suvdinnávccalaš vuogi mielde fylkka ássiide buorrin ja earenoamážit sámi kultuvrii, boazodollui, meahcásteapmái, ealáhusdoaimmaheapmái ja servodateallimii vuođusin.»
án lága áigumuš lea mu mielas hui buorre vuolggasadjin maiddái min seminarii. Mii lea dása čoahkkanan ovttas ságastit mo galgat ávkkástallat luonddu nu ahte boahttebuolvvaide lea ovdamearkan luondduávkkástallamis.
Mu mielas gal leat otne ollu mohtorfievrrut stuorra áittan min lundui, ja dasa fertet mii ovttasráđiid gávnnahit jierpmálaš geavahan-njuolggadusaid.
Mun hálidan maid namahit ahte mun leamašan mannanjagi mielde nu gohčoduvvon „Prosjekt barmarkskjøring iFinnmark“ maid Sámediggi ovttasráđiid departemeanttain lea vuolggahan. Doppe ledje, dadjat buot searvvit mat gávdnojit Finnmárkus, mielde. Mu mielas lei doppe hui buorre oktasaš vuoigŋa dan dafus go mii ovttas dovddasteimmet ahte mohtorfievrogeavaheapmi lea badjilmeare go ii čuovo doarvái dávjá daid gárvves máđiid mat gávdnojit. Doppe bođii maid ovdan ahte eanetlohku lea mielas gáržžidit bievlavuodjima.
Giitu Ole Henrikii go maiddái halai mu váibmuášši birra. Mu váibmuášši lea hehttet viidásat luonddunuoskkideami, go mun oainnán min birrasis leat ollu ruskkat juohke sajis, eai dušše geaidnoguorain, muhto johk-gáttiin, biilabisánansajiin, priváhta eatnamiin ja erenoamážit doppe gos mohtorfievrruiguin johtalit. Sivalaččat leat mii sápmelaččat ieža, dálonat ja boazodoallu maid. Mu mielas fertejit dál buohkat duođaš ealligoahtit čorgadeabbot gos dal jo jođežit. Ja ieža mielde suodjaleamen meahci, nu go Ole Henrik logai.