Stavanger2Trondheim – Gul stripe med farbare fylkesveger

Vedtak, RTP-investeringar 2025

Vedtak 17. juni 2025, møteprotokoll

PS 54/2005 Regional transportplan – Investeringar – Rullering 2025

1. Fylkestinget sluttar seg til Handlingsprogram RTP Investeringar 2025 slik det ligg føre, og legg denne til grunn for det vidare arbeidet med budsjett 2026 og økonomiplan 2026-2029 fram mot fylkestinget i desember 2025.

2. Fylkestinget registrerer at fylkeskommunen er i ein utfordrande økonomisk situasjon som får konsekvensar for handlingsrommet for investeringane på fylkesvegnettet. Konsekvensane av meirekstremvêr vil og gje auka uføresette kostnadar. Fylkestinget legg til grunn at det er særleg viktig å sikre framkome på vegnettet, og vil difor prioritere å ta vare på det eksisterande vegnettet og avgrense vedlikehaldsetterslepet. Difor må oppgradering og utskifting av fylkesvegbruer, kaier og forsterkingsprogrammet prioriterast framfor nybygg.

3. Fylkestinget slår fast at dei høge økonomiske bindingane knytt til vedtekne prosjekt gjer at det er stramt økonomisk handlingsrom for å følgje opp strategiane i Regional transportplan. Fylkestinget konstaterer at det er avgrensa moglegheit for oppstart av nye tiltak innanfor rammeløyvingane til regionale hovudvegar, trafikktryggleik og mindre utbetringar, mjuke trafikantar og kollektivinfrastruktur. Dersom det er økonomisk handlingsrom ønskjer fylkestinget å prioritere midlar til rammeløyvinga for trafikktryggleik og mindre utbetringar.

4. Fylkestinget held fast på tidlegare prioritering av store rassikringsprosjekt der fv. 609 Heilevang, fv. 49 Steinsdalen-Eikedalen (Tokagjelet) og fv. 49 Nordrepollen-Austrepollen skal prioriterast i tråd med PS 138/2024 Budsjett 2025/økonomiplan 2025-2028 innkludert budsjettmerknaden; «Fylkestinget har ei klar forventning om at Vestland fylkeskommune og Kontaktutvalet som er oppretta for prosjekta på Fv 49, Tokagjelet og Poll til Poll, som del av arm til Bergen, også arbeidar for samfinansiering av desse prosjekta. Låneopptak for fylkeskommunen sitt bidrag til desse prosjekta skal finansierast av øyremerka skredsikringsmidlar avsett på bunde fond». Fylkestinget legg til grunn at innanfor dei statlege rassikringsmidlane skal 100 mill. kr årleg gå til innovativ skredsikring og andre mindre skredsikringstiltak.

5. Etter prosjekta i punkt 4 er realisert, arbeider ein vidare med fv.79 Steinstøberget, fv.5600 Arnafjorden, fv.5704 Oldedalen og fv.55 Esefjorden, i tråd med tidlegare vedtak i handlingsprogrammet for RTP. Grunna fylket sin økonomiske situasjon og kostnadene ved bru, ligg realisering av prosjektet fv. 55 Bru over Esefjorden fram i tid. Fylkestinget vil uansett skredssikre fv. 55 i Esefjorden, og ber om at fylkesdirektør kjem tilbake med sak om å vurdere dette som innovativ skredsikring. 

6. Fylkestinget kjem attende til ferjeavløysingsprosjekta når det pågåande arbeidet med ei forbetra ferjeavløysingsordning er ferdig. Masfjorden kommune kan arbeide vidare med forbetring av Masfjordsambandet. 

7. Fylkestinget ber fylkesdirektøren om å prioritere tiltak med ekstern finansiering som til dømes statlege midlar, bompengefinansiering og spleiselag med kommunar og private. a. Fylkestinget ber fylkesdirektøren om å kome attende med saker knytt til bompengefinansiering av fv. 57 Holmeli-Sætenes og Osterøypakken. b. Fylkestinget meiner at rammeløyvinga til samfinansiering bør vidareførast, og at faglege vurderingar vert lagt til grunn for prioritering av samfinansieringstiltak. c. Fylkestinget viser til at Statens vegvesen i sitt gjennomføringsprogram har lagt inn kollektivknutepunkta i Førde, Leirvik og Sogndal, og ber fylkesdirektøren gå i dialog med vegvesenet om mogleg samfinansiering for prosjekta i komande økonomiplanperiode. 

8. Fylkestinget viser til at det er mange pågåande planprosessar for tiltak som ikkje har finansiering til gjennomføring, og at planreserven er for høg i forhold til dei økonomiske ressursane som er tilgjengeleg for gjennomføring. Oppstart av nye planprosjekt krev store ressursar, og fylkestinget ser at det er avgrensa rom for å starte opp nye planar. Fylkestinget ber fylkesdirektøren om å prioritere planar for prosjekt som er realistiske å få gjennomført. 

 9. Fylkestinget ber fylkesdirektøren vurdere å utarbeide breiare konsekvensanalysar ved prioritering av framtidige investeringsprosjekt i Regional transportplan. 

10. Fylkestinget ber også om ei sak der fylkesdirektøren drøfter endring frå P50 til P85 kostnadsestimat i investeringsprosjekt i RTP for å redusera økonomisk risiko. 

11. Fylkesutvalet ber om ei sak i god tid før neste rullering av RTP der ein vurderer om ein skal ha politisk vedtekne marginallister over tiltak.