Drøyt 300 stemmeberettiga i Modalen kommune skal dei neste vekene fram til 10. mars stemme om dei vil ha vindkraftanlegg eller ikkje. Vindkraftanlegget vil om det vert bygd vere det største vindkraftverk hittil i Noreg.

Folkemøter

Søndag 16. februar var det ei stor markering i Knarvik i regi av DNT med Bergen og Hordaland Turlag og lokallaget i Nordhordland med mykje folk tilstades, og onsdag 19. februar var det folkemøte i Modalen, også med godt oppmøte.

Alver og Masfjorden har tidlegare sagt nei, og det kviler stor spenning til kva fleirtalet av Modølingane vil gje som råd til sine kommunepolitikarar.  Ordstyrar på folkemøtet, Sølve Rydland, til dagleg politisk redaktør i BA, innleia med å spørje om kor mykje er naturen verdt for Modølingane. 

Norsk Vind AS satte alle krefter til for å overtale dei 400 innbyggjarane om å seie ja og lova 100 millionar kroner i produksjonsavgift og eigedomsskatt i året, garantert i 10 år. Dette utgjer fordelt pr. innbyggjar kr. 200 000 pr. år. Ein kan undre seg over om det er slik vi ønskjer det, at naturen på sett og vis skal kunne kjøpast ut og industrialiserast, koste kva det koste vil.

Støy og helseplager

Det er opplagt store ulemper for innbyggjarane i Modalen. Støyplager og forringa landskapsverdiar, tap av eit viktig friluftslivsområde. Men kva med ulempene for dei plantene og dyra som har leveområde sitt i det om lag 55 km²  store industrianlegget kor det skal sprengjast ut både fjell og fauna? Villreinen eller Snøbinnemosen, kva kompensasjon skal dei få?

Det var særleg tankevekkande å høyre Sveinulf Vågene i Motvind halde foredrag om støy  og korleis lyden vil bevege seg ned i dalen gitt ulike tilhøve. Dette er eit tema som har lite faggrunnlag, og som har gitt påviste helseplage ved tidlegare utbyggingar.

Frå juli 2022 vart det innført ei produksjonsavgift for vindkraft på land som skal betalast til vertskommunane der kor kraftproduksjonen foregår. Dette for å bøte på ulempene. Og, for å gjere det meir attraktivt for vertskommunane å sette av areal til vindkraft. Kommunar med ein beskjeden kommuneøkonomi skal få spe på inntektene. Modalen er derimot ein veldig rik kraftkommune, som alt har forsaka Steinslands- og Modalsvassdraget.

Unge ønskjer ikkje vindkrafta

Difor var det så befriande godt for tilhøyrarane å høyre Modølingen Knut Moe som meinte at det som var att av natur i Modalen måtte takast vare på, for dette er ein viktig grunn for at ungdommane vil kome tilbake til Modalen. Og i Modalen kommune er det mangel på arbeidskraft, ikkje arbeidsplassar. Det vart også den klare bodskapet frå organisasjonen Ung for fjella, ungdommen ønskjer ikkje vindkraft i Modalen og Stølsheimen. Det gir håp om at fjella vil få stå i fred.

Svært verdifullt

NVE definerte Modalsfjella i Stølsheimen som svært verdfulle allereie i 2019 då dei tok området ut av Nasjonal ramme for vindkraft. Grunngjevinga var store nasjonale verdiar knytt til natur- landskap og friluftsliv. Og natur blir ikkje mindre verdt ettersom åra går. For å sitere Ingvar Vik, ein friluftsmann som har gått mykje i desse fjellområda:

Det er berre eit fattig samfunn som kan øydelegge det vi har igjen av fri, vill og levande natur. Vi er nødt til å ha respekt for det som er større enn oss, meir varig og meir betydningsfullt enn oss sjølve.

Vi må verne meir natur, ikkje mindre